cydberthyniad (cydberthyniadau) eg

Dyma’r term sy’n cael ei ddefnyddio i ddisgrifio’r berthynas rhwng dau newidyn mewn set o ddata.

Mae gwahanol fathau o gydberthyniad:

1. Cydberthyniad positif sy’n golygu wrth i un maint gynyddu, mae maint arall yn cynyddu hefyd. Mae’r graff cyntaf cyferbyn yn enghraifft o hyn.

   Gallwn weld wrth i’r tymheredd godi, mae nifer yr hufen iâ sy’n cael ei werthu yn cynyddu hefyd.

2. Cydberthyniad negatif sy’n golygu wrth i un maint gynyddu, mae maint arall yn gostwng. Mae’r ail graff cyferbyn yn enghraifft o hyn.

   Gallwn weld wrth i nifer yr wythnosau gynyddu, mae gwerthiant y gân ar iTunes yn gostwng.

Pan mae’r pwyntiau‘n agos mewn llinell syth, mae’n awgrymu perthynas agos. Rydym yn dweud bod y cydberthyniad yn uchel neu’n gryf.

Pan mae’r pwyntiau’n fwy gwasgaredig, mae’n awgrymu perthynas sydd ddim mor agos. Rydym yn dweud bod y cydberthyniad yn isel neu’n wan.